Siglir tar il cuntegn

Header

cuntegn

Svizra Raiffeisen vul reducir filialas

Ils proxims tschintg enfin diesch onns duain radund 170 filialas svanir.

La gruppa da la Raiffeisen ha il mument bunamain 970 posts da banca en Svizra. Ils proxims onns vul ella reducir quests posts sin bun 800. Il schef da la banca Raiffeisen, Patrik Gisel, ha ditg envers la gasetta NZZ ch'el na veglia betg midar la banca da fund ensi. La Raiffeisen veglia vinavant sa concentrar sin sia fatschenta da coc, dentant cun damain bancas.

Futur da la gruppa da Raiffeisen

Gisel quinta che tut las transacziuns vegnan cun il temp fatgas a moda digitala. Ils collavuraturs da las bancas Raiffeisen stoppian perquai sa concentrar sin la cussegliaziun e quai veglia dir ch'il prender giu daners succedia quasi mo anc sur bancomats. Il grad da digitalisaziun vegnia a s'augmentar ils proxims tschintg onns, perquai veglia la Raiffeisen investir en ses chanals digitals per lavurar anc pli effizient.

Banca Notenstein n'è anc betg là nua che Gisel vul

La finamira da la gruppa Raiffeisen saja che la banca privata Notenstein, ch'ella aveva cumprà, portia radund 10 pertschient dals retgavs da gruppa. La banca stoppia dentant anc sa sviluppar ed er esser qua per clients da la Raiffeisen cun giavischs d'investiziun pli cumplexs. Ma independentamain da la Notenstein LA Roche restia la fatschenta da retail la pitga principala da la Raiffeisen.

Patrick Gisel sclauda tschains negativs

En l'intervista cun la NZZ ha Gisel sclaus d'introducir tschains negativs per ils clients da la Raiffeisen. Quai na chapissan ils clients da la banca betg. Avant che studegiar vida talas mesiras veglia la Raiffeisen trair a niz tut las pussaivladads da cumpensaziun pussaivlas.

RR novitads 11:00

Artitgels legids il pli savens