La rait electrica è en in mender stadi che quintà fin uss. Quai scriva l’Uffizi federal d’energia. Per radund in quart da la rait da transmissiun da Swissgrid dovria mesiras urgentas ils proxims tschintg fin diesch onns.
La rait d'electricitad stoppia dentant betg mo vegnir mantegnida, mabain era vegnir bajegiada ora. Quai saja per l'ina necessari per eliminar puncts critics e flaivels en la rait, per l'autra per midar sin in sistem da producziun pli decentral, sco che la strategia d'energia 2050 prevesa.
Las proceduras da lubientschas per projects sajan era suenter la nova lescha per la rait d'energia 2019 betg «substanzialmain» pli sveltas, sco che l'Uffizi federal d'energia scriva. Blers dovrian enfin 15 onns fin ch'els èn finids.
Perquai ha il Cussegl federal dà l'incumbensa al Departament federal da l'ambient, traffic e communicaziun d'examinar, co che las proceduras possian vegnir acceleradas, e da proponer ina midada da lescha correspundenta fin il mars 2024.
