L’onn 2024 è stà marcà d'aura fraida e bletscha, cun consequenzas per la racolta: en la cultivaziun da legums e la viticultura hai dà gronds donns pervia da schelira e malsognas.
La producziun da latg è restada stabila cun 3,7 milliuns tonnas, era sch'il dumber da vatgas da latg è sa sbassà. Questa sparta furma ¼ da la valur totala da la producziun agricula. En il sectur da latg cuntinuescha il process da concentraziun: il dumber da manaschis da producziun da latg è sa reducì per 2,5%, sin 8'358 manaschis en il territori da muntogna e 8'290 en la val. Quai è be pli la mesadad dad avant 25 onns. Da l'autra vart è la grondezza dals manaschis s'augmentada: la surfatscha media è creschida da 19,1 sin 29,7 hectaras.
En general sa mida la structura: il dumber total da manaschis è sa reducì per 1,3% sin 47’075, cun dapli manaschis gronds e pli paucs da grondezza media. Era surpiglian adina dapli dunnas la direcziun da manaschis, oz è quai il cas tar 7,7 % dals manaschis. Quai sa reflectescha en la lavur a temp cumplain che crescha tar las dunnas e sa reducescha tar ils umens.
Malgrà las sfidas economicas e politicas, las famiglias purilas valiteschan lur vita pli positivamain che avant quatter onns. Ina retschertga actuala mussa che mo pli 15% sa sentan sutvalitads – la mesadad da l’onn 2021. Era las lungas uras da lavur vegnan percepidas pli pauc negativamain. Il pli apprezià vi da lur mastergn restan l'independenza e la colliaziun cun la natira ed ils animals. Critica vegn vinavant valitada la gronda quantitad da prescripziuns e las cundiziuns politicas che sa midan.
Il rapport inditgescha er ils fluss monetar: il Confederaziun ha investì 3,67 milliardas francs en l’agricultura ed alimentaziun – 4,4% da las expensas totalas. Da quai van 2,8 milliardas als pajaments directs.