Emprender chinais cun 40 onns? Ideas da l'emprender per vita duranta, ha la Confederaziun sustegnì cun radund 11 milliuns francs, per quatter onns. A tals purschiders da furmaziuns supplementaras, sto il Secretariat da stadi per furmaziun gaurdar sin la detta. El po numnadamain be sustegnair projects cun daners da taglia, ch'èn en il senn da la Confederaziun.
Ma, empè da metter cleras directivas, vegnia il secretariat da stadi dictà dals purschiders, hai num en in rapport da la Controlla federala da finanzas.
Uschia sco la Confederaziun maina actualmain la controlla, na scuvriss ins betg sch'i vegniss fatg maldiever.
Perquai che la controlla manchia, mettian las organisaziuns per furmaziun supplementara quints per contribuziuns, ch'ellas gnanc pudessan, di Eveline Hügli da la controlla da finanzas.
Ins n'haja nagins indizis ch'i saja vegnì malduvrà meds. Dentant anc sch'i vegniss fag maldiever, na scuvriss ins probablamain betg quai, uschia sco la Confederaziun mainia actualmain la controlla, ha ditg Hügli ad SRF. La Confederaziun na possia betg giuditgar sch'el haja pajà memia bler, u sch'el n'haja betg pajà avunda.
Consequenzas pussaivlas
Tar la controlla haja la Confederaziun mancanzas che possian vegnir nizzegiadas e ch'ella stoppia exnum curreger, uschia il fazit da la controlla da finanzas. Organisaziuns da furmaziun supplementara pudessan er vegnir instigadas tras talas largias, d'inditgar autas subvenziuns ed uschia optimar lur situaziun finanziala. Singuls purschiders sajan schizunt per il pli dependentas da la Confederaziun. Quai munta che talas organisaziuns, na pudessan gnanc surviver senza subvenziuns.
Renvià renfatschas
Il Secretariat da stadi per furmaziun che vegn crititgà fermamain, renviescha dentant las renfatschas. Il rapport saja tras e tras negativ. Memia negativ, di il vicedirectur Rémy Hübschi.
Nus na dain betg simplamain or daners, nus dirigin nossas subvenziuns tenor il fundament da la lescha e quai tenor noss meglier savair e pudair.
Il Secretariat da stadi per furmaziun adempleschia sia funcziun sco controlla. Plinavant n'haja la Controlla federala da finanzas betg pudì constatar che subvenziuns sajan vegnidas malduvradas, ha declerà Hübschi.
La spetga da la Controlla federala da finanzas per dapli controlla e directivas pli exactas vegnian ins ad analisar e nua pussaivel er a realisar tant pli svelt.