Siglir tar il cuntegn

Header

cuntegn

Rapport da l'OECD La Svizra ha reagì bain durant la pandemia

La Svizra haja reagì adequat ed effectiv en il cumbat cunter la pandemia. A questa conclusiun vegn l'Organisaziun da cooperaziun e svilup economic OECD. L'economia svizra saja relativ resistenta.

Interpresas capablas da concurrer sin nivel global, persunal fitg qualifitgà, ina bassa dependenza da la gastronomia e dal sectur da divertiment: Tut quels facturs hajan diminuì ils effects negativs da las mesiras cunter la pandemia.

Las autoritads hajan concedì agid svelt e generusamain, scriva l'OECD vinavant. L'auta fidanza en la regenza ed en il sistem da sanadad fitg effizient haja lubì mesiras pli moderadas ch'en auters lieus. Era haja la regulaziun da la lavur curta sustegnì bleras interpresas ed er lavurers e lavureras. Il rapport vegn dentant er a la conclusiun, ch'i saja temp da reducir questa regulaziun sin ils secturs ils pli pertutgads. En il temp da restabiliment impedeschian quellas mesiras il martgà da lavur.

Nairas uras da refurmar l'AVS

En il nov rapport davart la Svizra renda l'OECD er attent, ch'i saja nairas uras da refurmar il provediment da la vegliadetgna. I dettia adina dapli persunas pensiunadas – e quai procurai per pli auts custs tar las pensiuns, en il sectur da sanadad e tar la tgira a lunga durada. L'OECD cusseglia, d'augmentar las purschidas da tgira d'uffants e d'introducir in sistem da temp per geniturs.

Protecziun dal clima

Il sectur da finanzas en Svizra investeschia anc fitg bler en ieli e charvun, dentant pauc en energias regenerablas u electromobilitad. L'OECD propona anc dapli transparenza pertutgant l'effect sin il clima dals portfolios finanzials. La lescha da CO2 fiss stada in pass impurtant per cuntanscher la finamira da netto-nulla tar las emissiuns da gas cun effect da serra fin 2050. La populaziun svizra ha refusà quella lescha a l'urna. La Svizra duai perquai auzar ils custs per emissiuns da CO2. Per il mument sajan quels pli bass ch'ils custs correspundents dal clima.

audio
Per tadlar: curt e cumpact
ord RTR Audio dals 20.01.2022.
laschar ir. Durada: 55 Secundas.

RTR novitads 14:00

Artitgels legids il pli savens

Scrollar a sanestra Scrollar a dretga