Sin la rait da trens da la SBB curseschan en media mintga di trais trens senza in sistem d’evitar collisiuns che funcziunescha. Quai resulta d’in rapport actual dal Servetsch svizzer d’inquisiziun da segirezza. Er per l’autoritad da surveglianza da l’Uffizi federal da traffic sajan questas cifras novas. Quai ha ditg il pledader da medias da l'Uffizi federal da traffic, Michael Müller, envers SRF. La dimensiun saja stà «surprendenta».
Tant la SBB sco er la BLS hajan en il fratemp reagì e prendì mesiras. Plinavant veglian ins surlavurar las prescripziuns pertutgantas.
Accident grev a Zollikofen
Il rapport pertutga in accident d’avant in mez onn a Zollikofen en il chantun Berna: Ina locomotiva da la BLS è lura collidada cun in tren da construcziun che steva airi – quai cun ina spertezza da passa 50 kilometers l'ura. Tenor il rapport haja il locomotivist survesì in signal da frainar. Sinaquai avess in sistem da controlla da franar il tren automaticamain. Quel sistem saja dentant vegnì tschentà giu dal locomotivist, suenter consultaziun cun il servetsch da transport. Atgnamain valan lura mesiras da segirtad augmentadas. En quest cas sajan quellas dentant «vegnidas interpretadas a moda memia vasta», uschia in expert da la Sust envers SRF.
Adattà al tema
