Siglir tar il cuntegn

Header

cuntegn

Rapport da whistleblowing Mintga terza firma pertutgada d'in agir illegal

Mintga terza interpresa svizra è stada pertutgada l'onn passà d'in agir illegal e betg etic ch'è vegnì a la glisch grazia a whistleblowing. Quai resulta dal nov rapport da whistleblowing che la Scola auta spezialisada dal Grischun a fatg ensemen cun la EQS Group SA. En connex cun las consequenzas ch'il whistleblower grischun Adam Quadroni a stuì purtar ha ditg il manader dal project tar la scol'auta, Christian Hauser, envers il schurnal regiunal da radio SRF che betg tut ils whistleblowers fetschian talas experientschas negativas. Experientschas negativas dettia dentant tuttina anc bler memia savens. Quai er, sch'i sa tractia propi d'in abus che possia er metter en privel la publicitad u custar bler als pajataglias.

Christian Hauser: betg tut ils whistleblowers fan experientschas negativas
00:06 min, RTR Audio dals 11.10.2021.

Damain annunzias da whistleblowing il 2020

La media da 34 annunzias saja var in terz pli bassa ch'il 2019 en firmas svizras. Lura vevan ils posts da whistleblowing nudà en media 52 annunzias. Quai scriva la Scola auta spezialisda dal Grischun en ses rapport da whistleblowing – fatg ensemen cun la EQS Group SA. Passa 300 interpresas svizras han respundì al studi. En Svizra han tenor il studi passa 60% da las interpresas dumandadas in post per prevegnir e scuvrir abus.

Abus en connex cun homeoffice e reducziun da plazzas

La pandemia da corona saja in motiv per las annunzias d'abus dal 2020. Quella haja en tschertas firmas numnadamain muntà dapli homeoffice ed er ina reducziun da plazzas, uschia che structuras e process sajan sa pegiurads per collavuraturas e collavuraturs. Er puncto post d'annunzia per abus hajan ins constatà mancos, uschia scriva la FHGR vinavant en ses rapport.

RTR novitads 12:00 ;

Artitgels legids il pli savens

Scrollar a sanestra Scrollar a dretga