Siglir tar il cuntegn

Header

In lavurant pli vegl en la producziun da plapiri.
Legenda: La Svizra duai stgaffir meglras cundiziuns per promover l'impiegar da lavurants pli vegls. Keystone
cuntegn

Rapport dals pajais OECD La Svizra duaja auzar la vegliadetgna da pensiun sin 67 onns

Er sche las persunas en Svizra giaudian actualmain anc in aut standard da vita, fetschia da basegn da far adattaziuns al vegnir pli vegl da la populaziun. Quai recumonda l'Organisaziun da cooperaziun e svilup economic en Europa (OECD) en ses rapport economic.

Il mument giaudia la populaziun en Svizra anc adina in aut standard da vita en Svizra. La Svizra haja il terz aut product interiur brut per chau dals pajas da l'OECD. La politica da budget saja solida ed ils debits bass, scriva la OECD en ses rapport economic ch'è vegnì publitgà il glindesdi.

Tenor l'OECD stuess la Svizra uss dentant urgentamain far adattaziuns al vegnir vegl da la populaziun. En in emprim pass duess uschia la vegliadetgna da pensiun da las dunnas vegnir adattada a quella dals umens. Sin quai duess la vegliadetgna da pensiun pass per pass vegnir auzada sin 67 onns.

Dapli impiegads pli vegls

En il medem mument duaja la Svizra cumbatter ils obstachels per engaschar impiegads pli vegls. Latiers tutgan per exempel che la paja sco er las contribuziuns per las assicuranzas socialas s'augmentan per impiegads pli vegls. Quai vesa la OECD sco puncts negativs per promover l'engaschar da persunas pli veglias.

Midaments tar il sistem da taglia

Er sbassar la taglia per persunas cun pitschnas pajas pudess gidar a preparar il sistem sin il vegnir pli vegl da la populaziun. Plans per auzar la taglia sin plivalur sco er per sbassar la taglia da pèrs maridads giajan en la dretga direcziun, manegian ils auturs dal rapport.

RR novitads 15:00