La Svizra n'è betg perina cun la critica da l'Organisaziun da las Naziuns Unidas tge che pertutga las stentas cunter il rassissem. Ella refusa la critica formulada d'ina gruppa d'experts independents da l'ONU. La gruppa d'experts aveva tranter auter pretendì che la Svizra elimineschia mancanzas en las leschas en connex cun la discriminaziun da persunas cun ragischs africanas.
Il rapport cuntegnia malchapientschas, ha ditg l'ambassadur svizzer tar las Naziuns Unidas Jürg Lauber a Genevra davant il Cussegl dals dretgs umans da l'ONU. Dentant saja rassissem envers umans cun ragischs africanas in grond problem che stoppia vegnir affruntà.
Rassissem sistemic en Svizra
Ils experts da l'ONU hajan mo examinà cas singuls che na sajan betg represchentativs. Ils experts avevan discurrì cun parents da l'um cun derivanza africana ch'è vegnì mazzà da la polizia tar ina intervenziun a Morges ed avevan inscuntrà Brian («Carlos») en la praschun a Turitg.
Il rapport fetschia presumziuns falladas, dian ils represchentants da la Svizra tar l'ONU. Rassissem sistemic stoppia dentant vegnir examinà meglier. Davart la tematica prevesa la Confederaziun d'edir las proximas emnas in studi.
