Siglir tar il cuntegn

Header

cuntegn

Rapport extern suenter corona BAG ha fatg buna lavur – n'era dentant betg preparà sin crisa

L'emprim onn da pandemia ha l'Uffizi federal da sanadad «dumagnà en general bain sias incumbensas». Quai resulta d'in rapport extern che la Confederaziun ha laschà far. Las preparativas ed il management da crisa èn dentant manglusas.

Las expertas ed ils experts externs crititgeschan plirs puncts en l'agir da las autoritads durant la pandemia:

  • Da serrar las scolas la primavaira 2020 n'è betg stà «commensurà». Quai saja stà ina gronda chargia per uffants, giuvenils e geniturs e possia avair consequenzas per il svilup da numerus uffants.
  • Sch'il scumond per tractaments medicials betg urgents è stà adequat metta il rapport medemamain en dumonda.
  • L'isolaziun da persunas da risico (p.ex. persunas en chasas d'attempads) èsi da valitar sco critic: Scumonds da visitar persunas en chasas da tgira hajan chaschunà gronds fastidis e «consequenzas negativas per la sanadad da cussedentas e parents».

La raschun per quels puncts da critica: La Confederaziun, ils chantuns ed autras instituziuns na sajan betg stads preparads bain avunda sin ina crisa. Era il BAG na saja betg stà preparà bain avunda organisatoricamain.

Il managament da crisa pativa tenor il rapport gia pli daditg da problems: I na deva nagina strategia digitala e memia paucs deposits da material da protecziun. Quests problems sajan vegnids a la glisch durant la pandemia – na sajan dentant betg stads da schliar durant la crisa.

Il manader da l'analisa, Andreas Balthasar, ha dentant accentuà avant las medias a Berna ch'il provediment da sanadad en Svizra saja stà garantì durant tut il temp.

Expertas ed experts

Avrir la box Serrar la box

Gia l'onn 2020 ha la Confederaziun decis da laschar analisar l'agir da las autoritads durant la pandemia da Covid-19. Il gremi extern ch'è sa mess a la lavur, sa cumpona da persunas d'interpresas da cussegliaziun, d'in biro d'advocatura e dad universitads da la Svizra e da l'exteriur.

En tut ha il team examinà passa 3'000 documents, analisà rapports da medias e cumpareglià las datas svizras cun quellas da l'Austria e la Svezia. Plinavant han las expertas ed ils experts fatg ina retschertga represchentativa tar la populaziun ed intervistas cun per exempel responsabels da chasas da tgira.

audio
Evaluaziun da la strategia da corona dal BAG
ord Actualitad dals 26.04.2022.
laschar ir. Durada: 4 minutas 14 Secundas.

Sbagls era dal Cussegl federal

Las expertas ed ils experts crititgeschan ch'il Cussegl federal ha chalà da manar il pajais la stad 2020. Uschia sajan ils chantuns stads mal preparads sin la segunda unda da l'atun 2020. Era en vista a l'enviern 2021 haja dà plirs problems da coordinaziun tranter Confederaziun e chantuns.

L'emprim lockdown per l'entira Svizra saja perencunter stà ad uras, perquai ch'el haja gidà a restrenscher las infecziuns. Ed era las mesiras enturn la terza unda da corona valiteschan las expertas ed ils experts a moda positiva.

Tschintg tips

Il rapport skizzescha era tschintg cussegls per il Cussegl federal:

  1. Il BAG e la Confederaziun duain sa preparar meglier sin ina proxima crisa, quai vul dir: Rinforzar las ressursas persunalas ed exercitar regularmain in management da crisa.
  2. Confederaziun e chantuns duain reglar a moda lianta il provediment da sanadad en in cas da pandemia.
  3. Il BAG duai accelerar – ensemen cun ils chantuns ed ulteriurs partenaris – la digitalisaziun ed il management da datas aifer il provediment da sanadad.
  4. Il BAG, Confederaziun e chantuns duain ponderar co involver sistematicamain ils partenaris impurtants en las preparativas per decider e realisar mesiras.
  5. Il BAG duai resguardar a moda cumplessiva la sanadad da la populaziun en cas d'ina pandemia, pia era la sanadad psichica.

RTR novitads 15:00

Artitgels legids il pli savens