Millis e millis visitaders e visitadras attiran ils cumbats mintg'onn cun lur «Cumbat da las reginas» («combat des reines»). Las vatgas d'Ering èn nairas, grondas e musculusas. Ellas valan sco dinamicas e stinadas, vegnan tratgas surtut en il Vallais e vegnan era duvradas per il marketing turistic.
Cumbats hajan spendrà la razza d'Ering
Quests cumbats sajan era ina da las raschuns che la razza d'Ering haja insumma survivì. En media furneschian las vatgas d'Ering damain charn e latg che las razzas concurrenzas, ha ditg l'etnolog Thomas Antonietti envers SRF. La razza saja bunamain stada extincta. Avant radund 100 onns hajan lura ils cumbats cumenzà. Ed entant datti tals cumbats en il Vallais, però era en la Val d'Aosta en l'Italia dal nord.
Cumbats chaschunan cuntraversa
Per ils ins tutgan tals cumbats tar la natira da la vatga d'Ering. Ellas suondian l'instinct e fetschian tals cumbats era sin il prà per definir l'ierarchia en la gruppa. Quai conferma era il veterinari chantunal dal Vallais, Eric Kirchmeier. Sch'ina vatga na vul betg cumbatter, lura na stoppia ella era betg.
Da l'autra vart fan organisaziuns per la protecziun d'animals valair ch'il cumportament natiral da la vatga vegnia nizzegià ora ed explotà per far in spectacul divertent per ils carstgauns. Tals cumbats chaschunian anc stress supplementar per ils animals – sper ils cumbats ch'i hajan gia sin ils prads, sco quai che SRF impact ha rapportà.
Ina denunzia penala d'avant 3 onns aveva la giustia vallesana però refusà avant 2 onns. Il bain dals animals saja garantì. Quai ch'ha era da far cun l'ordinaziun chantunala ch'ils cumbats vegnan survegliads, e tar cumbats pli stressants era interruts, di Kirchmeier.