Siglir tar il cuntegn

Header

da sanester scrit FIFA e dretg il president Sepp Blatter che va davent
Legenda: Sepp Blatter va - e las reacziuns ein positivas. Reuters
cuntegn

Svizra Reacziuns positivas sin la demissiun da Blatter

La demissiun da Sepp Blatter sco president da la FIFA frunta sin reacziuns positivas. Quai tant tar las associaziuns da ballape internaziunalas sco er tar ils sponsurs. Er sche la decisiun saja stada greva per Blatter saja quella stada gista uschia il schef da l'UEFA - Michel Platini.

Er ils top-sponsurs sco Coca Cola, Adidas e Visa beneventan che Blatter va. Quai vegnia a gidar la FIFA da realisar l'adattaziun necessaria da sias structuras hai gì num.

Medias americanas rapportan entant che l'FBI e la procura publica americana investigheschian cunter Blatter. Quai n'è però betg vegnì confermà. Confermà è perencunter che Joseph Blatter sa retira suenter 17 onns a la testa da al FIFA. El maina las fatschentas enfin tar in congress extraordinari per eleger in successur.

A la conferenza da medias a Turitg ha Sepp Blatter annunzià sia demissiun. El haja bain in mandat dals commembers da la FIFA, però betg da l'entir mund da ballape. Quai sco remartga vers la federaziun da ballape europeica UEFA ch'aveva crititgà ferm Blatter anc fin curt avant il congress d'elecziun.

Sepp Blatter maina vinavant las fatschentas da la federaziun mundiala da ballape. Quai fin ch’ins haja chattà in successur. Perquai vul Blatter convocar in congress extraordinari per che la FIFA possia eleger in nov president.

Sco termin probabel per il congress extraordinari ha inditgà il president da la cumissiun da la FIFA, Domenico Scala, il temp tranter il december 2015 ed il mars 2016. Tenor ils statuts da la FIFA dovria quai almain 4 mais per preparar in tal congress electoral extraordinari.

I dovra refurmas profundas cun in'autra persuna. Il congress ordinari en 1 onn fiss memia tard.
Autur: Sepp BlatterPresident da la FIFA

Las emprimas mesiras per las refurmas

Il temp che Blatter è anc en uffizi vul el nizzegiar per refurmas profundas en la federaziun. Là dovria quai ina midada da structuras da rudent. Tranter auter è quai tenor Blatter

  • Ina limita dal temp d'uffizi per il president e per ils commembers dal comité executiv.
  • Reducir il dumber dals commembers dal comité executiv.
  • Ils commembers dal comité executiv duain vegnir elegids dal congress da la FIFA

I manchia il sustegn

Pir venderdi passà era Blatter vegnì elegì a Turitg per in’ulteriura perioda da 4 onns sco president da la FIFA. Sco el ha ditg haja el sa laschà eleger, perquai ch’el haja gugent la FIFA e veglia mo il meglier per il ballape. Ma blers na sustegnian betg pli el, perquai sia demissiun.

La via da Sepp Blatter

1975 Blatter entra en la FIFA e daventa directur per programs da svilup.
1981 Blatter daventa secretari general.
1998 Blatter daventa president sco successur dal brasilian João Havelange.
2002 Scandal da corrupziun enturn il concurs da la firma da marketing da sport ISL. Havelange duai avair acceptà daners da corrupziun. Renfatschas era vers Blatter.
Blatter vegn reelegì al congress a Seoul.
2007 Blatter vegn reelegì al congress a Turitg.
2010 Suenter la surdada dal campiunadi mundial a la Russia (2018) ed il Katar (2022) datti renfatschas da corrupziun cunter il comité executiv. Blatter ha in alibi.
2011 Blatter vegn reelegì al congress a Turitg. 2 dis avant era sa retirà il cuntercandidat Mohamed bin Hammam. La cumissiun d'etica al suspendescha, perquai ch'el duai avair cumprà vuschs.
2015 Suenter l'arrestaziun da 7 funcziunaris auts da la FIFA curt avant il congress patescha era la reputaziun da Blatter. Tuttina vegn el reelegì cun 133:73 vuschs. Il cuntercandidat Ali bin al-Hussein sa retira suenter l'emprim scrutin.

RR novitads 6:00

Artitgels legids il pli savens