Il Gea a la Lescha da Covid mussia ch’il suveran sustegnia la politica da corona dal Cussegl federal, uschia il tenor general da las gasettas svizras dad oz. I saja dentant era ina incumbensa al parlament dagir avant ch'i vegnia anc mender.
Il «Tagesanzeiger» discurra dad ina victoria dal saun giudizi. Uschia saja sa cumprovà per la segunda giada la lescha da Covid-19 suenter la votaziun dals 13 da zercladur, ch'ils adversaris da las mesiras sajan en la minoritad. Ad els giaja l'obligaziun d'acceptar la manifestaziun dal suveran.
La «NZZ» suttastritga ch’ils adversaris da la lescha stoppian uss cumprovar ch’els na veglian betg sparter.
Il pievel haja remunerà la strategia da la Svizra cun in cler Gea. Il «Blick» pretenda dal Cussegl federal d’agir a moda pli resoluta, cunquai che la politica da corona pragmatica vegnia sustegnida da la populaziun.
Tenor il portal online «Watson» na saja uss betg pli necessari da resguardar la minoritad pauc solidarica da las persunas betg vaccinadas en il cumbat cunter la pandemia. Il portal online pretenda ussa in spert obligatori da vaccinar per las gruppas da professiun, nua ch'i saja legal ed ina regla da 2G per pudair far diever dal traffic public.