La gastronomia avess sperà ch’i giaja pli svelt cun las averturas, di Gastrosuisse. In’avertura pussaivla da las terrassas saja sulet per paucs manaschis ina schliaziun. Perquai appellescha Gastrosuisse als chantuns, da far squitsch en la consultaziun en favur da las ustarias.
Ch’il Cussegl federal targlini, uschia tuni era tar l’Uniun svizra d’artisanadi e mastergn. Cun sia strategia ignoreschia el la voluntad dal parlament, da l’economia e dals chantuns – che pretendian da finir il lockdown.
Partidas plitost cuntentas
La PPS è da l’avis che las schluccadas sajan arbitraras e nunchapiblas. Ed era la PLD s’exprima plitost critic, las vistas pauc concretas dal Cussegl federal impedeschian il planisar per la glieud, las interpresas e la cultura.
La PS è da l’avis, ch’il svilup epidemiologic stoppia esser la basa per las decisiuns dal Cussegl federal. Ed era l’Allianza dal Center manegia, che la situaziun actuala pretendia vinavant d’agir precaut. D’accord cun il plan ch’il Cussegl federal ha explitgà il venderdi, van era la Partida verda ed ils Verdliberals.