Siglir tar il cuntegn

Header

cuntegn

Reacziuns sin schluccadas Uniuns e partidas èn cuntentas – resalvas dal transport public

Il Cussegl federal ha decidì d'abolir ina gronda part da las mesiras. Regenza grischuna e partidas grondas èn cuntentas. L'Associaziun dals meds publics tema dentant che l'obligatori da mascra en il tren na vegnia betg pli resguardada.

La Regenza grischuna è cuntenta cun las schluccadas ch'il Cussegl federal ha decis. Quellas sajan da responsar cun la situaziun epidemiologica actuala. Quai ha ditg il president da la regenza Marcus Caduff.

audio
Regenza grischuna è cuntenta cun las schluccadas
ord Actualitad dals 16.02.2022.
laschar ir. Durada: 2 minutas 10 Secundas.

Ils chantuns dastgassan vinavant decider mesiras pli severas – per exempel mantegnair en tscherts lieus l'obligatori da certificat. Per Caduff na saja quai dentant nagin tema: Uschia valan en il Grischun las reglas tenor las decisiuns da la Confederaziun.

La regenza abolescha l'obligatori dal certificat per visitadras e visitaders d'instituziuns da sanadad. Plinavant abolescha ella er l'obligatori da purtar mascrinas sco er la recumandaziun da homeoffice en l'administraziun chantunala. L'aboliziun da las mesiras entra en vigur immediat.

Dubis pervi da mascrina en traffic public

En blers lieus scroda l’obligatori da mascrina, en il traffic public dentant betg. L'obligatori da mascrina en trens, bus e pendicularas vala anc enfin la fin da mars. Sco quai che l'Associaziun dals meds publics di, fissi stà ideal, sche tut las mesiras fissan vegnidas abolidas il medem mument. Uschia quintian ins che l'acceptanza per l'obligatori na vegnia betg pli ad esser uschè gronda. I na vegnia betg ad esser simpel da far valair l'obligatori da purtar mascra.

En il Grischun spera la Viafier Retica dentant vinavant ch'ils passagiers hajan disciplina. Quai ha ditg la pledadra, Yvonne Dünser, sin dumonda da RTR.

Grond plaschair en butias e gastronomia

Ch'ins possia davent da damaun ir a far las cumpras senza mascra ed ir en l'ustaria senza certificat beneventan la federaziun dals detaglists SwissRetail e GastroSuisse. Ils detaglists vegnian dentant a mantegnair tschertas mesiras da segirtad en atgna responsabladad. In exempel sajan las reglas da distanza e d'igiena, uschia SwissRetail. Ultra da quai recumondian ins al persunal da purtar vinavant la mascrina.

Maletg simbolic
Legenda: Naginas controllas pli. A partir da gievgia scroda l'obligatori da certificats en blers lieus, uschia er en ils restaurants. Keystone

Las ustarias sa legrian da puspè pudair beneventar tut ils osps. Quai ha communitgà GastroSuisse. Lur situaziun saja dentant anc adina tendida, Las svieutas sajan il 2021 per 40% pli bassas ch’avant la pandemia.

Reacziuns da las partidas

Las partidas grondas beneventan ch'il Cussegl federal stritga mesiras da corona. «Nairas uras» saja, scriva per exempel la Partida populara svizra. Betg chapibel saja però ch'il Cussegl federal resta vinavant tar la situaziun speziala. La PPS pretenda plinavant che la politica da corona dal Cussegl federal vegnia examinada da rudien. Era per la PLD èsi indispensabel d'emprender dals schabetgs dals davos dus onns. Mo uschia possian ins evitar ch'ins repeta sbagls gia fatgs.

L'Allianza dal Center spetga ch'ils process digitals en il sectur da sanadad funcziuneschian en temps da crisa. E la PS Svizra admonescha d'esser attent. La pandemia na saja anc betg a fin. Cun sguard sin l'atun spetga ella ch'ils chantuns sa preparan uss sin tut las eventualitads.

RTR novitads 17:00

Artitgels legids il pli savens

Scrollar a sanestra Scrollar a dretga