Siglir tar il cuntegn

Svizra Reclama da tubac influenzescha uffants e giuvenils

En bun duas emnas debattescha il Cussegl dals chantuns davart la reclama per products da tubac ed in eventual scumond da tala. L’Allianza d'anti tubac ha uss preschentà in nov studi. Tenor quel reducescha in scumond da reclama per tubac oravant tut il consum da tubac tar uffants e giuvenils.

Bleras cigarettas.
Legenda: La lobi da tubac tema in scumond da reclama per tubac ed ha gia empruvà da franar in tal al tribunal europeic - senza success. Keystone

In scumond da reclama per tubac reducescha il consum da tubac en spezial tar uffants e giuvenils. Quai resulta d'in studi che l'Allianza per ina ferma lescha da products da tubac ha preschentà.

Il studi ha analisà las consequenzas d'in scumond da tubac cumplessiv en tschintg pajais europeics. Per proteger ils uffants e giuvenils dal privel mortal dal fimar dovria era la Svizra ina ferma lescha per products da tubac, communitgescha l'allianza. La Svizra è in dals set pajais che n'ha anc betg ratifitgà la convenziun da tubac da la WHO.

Cussegl federal vul scumond

Il Cussegl dals chantuns tracta la nova lescha per products da tubac en la segund’emna da la sessiun. Il Cussegl federal vul scumandar reclama per products da tubac en il kino e cun placats.

La cumissiun predeliberanta dal Cussegl dals chantuns ha refusà la proposta e cusseglià da refusar la lescha. Ella argumentescha che la proposta dal Cussegl federal giaja memia lunsch – i na saja betg cumprovà che scumonds generals da reclama reduceschian il fimar.

Fin uss dat quai en Svizra in scumond da reclama per tubac en radio e televisiun. Plinavant è scumandada reclama che sa drizza explicitamain a minorens.

RR novitads 11:00