Il mais avant ils dis da festa ha la Posta Svizra gì da far ils maunc plains. Anc mai han clientas e clients tramess uschè blers pachets sco quest onn – en tut 18,6 milliuns pachets. Cumpareglià cun il temp avant Nadal 2018 saja quai in augment da 8,8%, uschia scriva la posta en ina communicaziun. Motors per il dumber da pachets èn tenor la posta ils dis d'acziun da Black Friday e Cyber Monday.
16 milliuns brevs per di
Blera lavur hai er dà per postinas e postins. En tut hajan els repartì enfin 16 milliuns brevs per di. Tranter quellas eran mintga di 106'000 spediziuns da l'ester. Ina gronda part da l'Asia.
RR novitads 11:00