Siglir tar il cuntegn
Inhalt

Svizra Recumandaziuns per consum d'alcohol curregidas engiu

La Cumissiun federala per dumondas d'alcohol recumonda da nov, sin il pli dus magiels da standard alcohol per umens. Quai èn duas stangas da biera, dus magiels da vin u dus vinars. Per las dunnas vala la mesadad.

Purtret d'ina dunna che tegna in magliel vin cotschen enta maun.
Legenda: La Cumissiun federala per dumondas d'alcohol cusseglia entant da consumar pli pauc alcohol. Keystone

Novs resultats scientifics hajan manà a questas correcturas, scriva la cumissiun federala. Vitiers recumond'ella da desister mintg'emna plirs dis da consumar alcohol. Enfin uss valeva la recumandaziun da dus fin trais magiels per umens e dus fin trais per dunnas.

A dunnas en speranza e dunnas che vulan vegnir en speranza cusseglia la cumissiun da desister dad alcohol, er durant il temp ch'ellas dattan latg. Persunas pli veglias e da quels che prendan medicaments, duain consumar alcohol a moda reservada.

Cumissiun federala per dumondas d'alcohol

Personen-Box aufklappenPersonen-Box zuklappen

La Cumissiun federala per dumondas d'alcohol è ina cumissiun ordaifer il parlament. Ella sa fatschenta tenor atgnas indicaziuns cun dumondas che han da far direct u indirect cun las consequenzas dal consum d'alcohol sin la sanadad.

Attenziun patescha

L'attenziun, la capacitad da percepir e la reacziun vegnan gia suenter be in magiel pli flaivlas, scriva la cumissiun. Betg be en il traffic mabain er tar la lavur, il sport e tuttas activitads che pretendan concentraziun duess ins desister dad alcohol.

Tenor l'Uffizi federal per sanadad baivan radund 4% da quels sur 15 onns regularmain memia bler. Radund mintga 5avla persuna sur 15 onns consumescha punctualmain alcohol a moda ristgada. Quai munta ch'ellas consumeschan almain ina giada il mais entaifer paucas uras almain tschintg magiels (umens) u quatter magiels (dunnas).

RR novitads 14:00