Las Svizras ed ils Svizzers vegnan ad avair l'ultim pled tar la lescha federala per la protecziun dal clima. La Partida populara svizra ha inoltrà gievgia il referendum a Berna, quai cun passa 100'000 suttascripziuns.
La PPS crititgescha che la lescha vegnia a procurar per ina mancanza d'electricitad che possia manar ad in blackout. Ultra da quai quinta ella tar in Gea a la lescha ch'ils pretschs per l'electricitad vegnian a crescher e che ieli da stgaudar, benzin e diesel sco era stgaudaments da gas vegnian de facto scumandads. Ils aderents da la lescha vesan quai tut auter. Tenor els reduceschia la lescha la dependenza da l'exteriur cunquai ch'ella promovia la realisaziun da projects per la producziun d'energia regenerabla. Sper quai duai er dar sustegns per l'industria e cunzunt per ils possessurs da chasas, quei sch'i midan ora il stgaudament electric, da gas u ieli cun ina pumpa da stgaudar.
La lescha ch'il parlament federal ha decidì l'atun passà è la cuntraproposta indirecta a l'iniziativa dals glatschers. Fin l'onn 2050 duai la Svizra uschia daventar neutrala al CO2.
