Igl era in grond success per las organisaziuns da natira avant dus onns cura che quellas han gudagnà a l'urna. Quellas han prendì il referendum encunter la lescha da chatscha che aveva l’intenziun da regular il luf pli simpel. La victura a l'urna ha però ditg da l'entschatta da porscher maun per ina soluziun pli adequata per regular il luf.
Sinaquai èn tut las organisaziuns involvidas sesidas vi da ina maisa; d'organisaziuns da natira enfin tar organisaziuns da puras e purs. E per surpraisa èn quellas sa cunvegnidas – in cumpromiss pareva palpabel. Dentant svelt è quel sa mussà sco illusiun.
Nus avessan propi pensà ch'il cumpromiss vegn resguardà pli fitg. Per nus èsi in tschert frust che nus ans stuain dar sco perdentas cun il resultat ch'è sin maisa. Tut quai che nus avain pensà da cuntanscher suenter la votaziun avant dus onns è vegnì bittà giud maisa.
Il parlament ha elavurà ina proposta ch'è anc vegnida rinforzada durant las debattas. Ed uss ha quel decidì ina revisiun da la lescha da chatscha che na resguarda insumma betg pli il cumpromiss tenor las organisaziuns da natira. Quellas èn dischillusas. «Igl è ina trumpada ch'ins n'ha betg resguardà la proposta da cumpromiss che nus avain elavurà cun ils stakeholders» di la presidenta da Pro Natura Svizra Ursula Schneider Schüttel. Dentant crititgescha la cussegliera naziunala da la Partida socialdemocratica er che la voluntad dal suveran n'è betg vegnida resguardada. «Avant dus onns ha la populaziun ditg a l'urna ch'il luf na duai betg pudair vegnir schluppettà senza in cler motiv».
Jau deploresch che la discussiun na sa basa betg pli sin fatgs, mabain vegn dirigida dad emoziuns.
«Nus stuain uss ponderar bain sche nus faschain in referendum u betg». Per Pro Natura, dentant er per autras organisaziuns da natira ed ambient èsi cler che la lescha decidida va memia lunsch.
Dentant da prender il referendum vul er dir ch'ins sto investir bleras ressursas e raps. Cunquai che la situaziun è sa midada cumpareglià cun avant dus onns è il punct da partenza in auter, di Schneider Schüttel. Il luf è da vesair adina pli savens er en la Bassa e la discussiun enturn il luf saja chargiada talmain, ensasez èsi daventà grev d'insumma far ina debatta che sa basa anc sin fatgs e betg sin emoziuns, di la dunna da Friburg. «I vegn mo pli discurrì dal luf sco bestga nauscha. La funcziun dal luf per l'ambient n'è betg pli vegnida resugardada. Quai è donn.»
Da vegnir cun in referendum cun success a l'urna tar in tema ch'è chargià talmain cun emoziuns saja difficil. Ursula Schneider Schüttel è dentant conscient che la basa da las organisaziuns da natira ha era pretensiuns. «I dat persunas che din cleramain che nus stuain far dapli per il luf e proteger quel pli fitg. Da l'autra vart èsi fitg grev da dumagnar tras il parlament insatge raschunaivel.»
Las discussiuns davos las culissas han cumenzà, uschia la presidenta da Pro Natura. Ina decisiun sch'ins fa in referendum u betg vegn a crudar durant il decurs dal schaner.
