Sco enfin uss, vegn l'emprendissadi da commerzi KV vinavant spartì sin trais lieus: la scola, il manaschi d'emprendissadi e sin ils curs ordaifer il manaschi – e quai resta era cun la refurma da l'emprendissadi. Tge ch'i na dat betg pli, èn ils divers profils da l'emprendissadi da commerzi. Pia vegnan il profil B da basa ed il profil E extendids tuts ensemen.
La refurma vala per tut la Svizra, dentant datti tenor Ralph Bärtsch, scolast e manader da project, grondas differenzas co che las scolas mettan en la pratica la refurma. Tenor el datti gia grondas differenzas entaifer il Grischun, pia tranter las scolas a Samedan, a Glion ed a Cuira.
Exempel a la scola da commerzi Cuira
Ralph Bärtsch lavura dapi 15 onns sco scolast en la scola da commerzi a Cuira. Tar la refurma era el manader dal project. Ensemen cun ils responsabels da la Svizra Orientala ha el discutà tge che sto vegnir midà.
La finamira è d'adattar il mastergn da commerzi al svilup dal mund da lavur. A Cuira lavuran ils emprendists e las emprendistas tenor cumpetenzas d'agir ch'èn orientadas a lecziuns. Pia sappian las persunas da tge temp ch'els han d'esser en tge stanza da scola e cun tge scolast u scolasta.
I dettia dapli lavurs en gruppa e pli pauca instrucziun frontala. La funcziun da Ralph Bärtsch sa numna tar la nova refurma era «coach», el instruescha anc adina las singulas tematicas. Tenor el sa focussescha l'instrucziun uss dapli sin problems ch'i dat tar la chapientscha.
L'entschatta era el fitg sceptic envers questa refurma. Suenter otg mais ch'el lavura tenor la nova refurma da l'emprendissadi da commerzi, tira el ina bilantscha positiva – i funcziuneschia bain.
Jau schess che las temas che nus avevan avant intgins onns, n'èn betg arrivadas. Nus essan critics, dentant è l'atmosfera tar la magistraglia e tar emprendistas ed emprendists positiva.
Emprendista en l'emprim onn
Morena Derungs fa l'emprendissadi tar l'Uffizi da militar e da protecziun civila. Ella è en l'emprim onn da l'emprendissadi e ha uschia cumenzà tenor la nova refurma da KV. Tar la lavur sto ella dar giu 10 incumbensas da pratica per semester – quai è ina differenza. Là sto l'emprendista descriver ina lavur en detagl e survegn ina nota per quai. La lavur dal mintgadi sco far posta, lavurar al fanestrigl e far telefons, quai resta.
En scola lavura ella adina vi dal laptop, sulettamain ils examens scriva ella sin palpiri. Ils examens vegnan fatgs a moda «Open-Book», pia po Morena Derungs per part duvrar l'internet u in spic. A la giuvna da Trimmis plascha quai, da betg stuair purtar tants cudeschs da scola. Ella di da sa sezza dentant ch'ella emprendia meglier cura ch'ella haja in cudesch real en ils mauns.
Il chantun Grischun sco patrun da lavur
En ils manaschis d'emprendissadi hai era dà midadas cun la refurma. En il manaschi na lavuran emprendists ed emprendistas betg pli tenor finamiras da prestaziun, però tenor incumbensas da pratica. I haja cunzunt midà la furma, co che las lavurs han da vegnir fatgas, ils temas sez èn per part medems. Bleras chaussas da l'emprendissadi èn er restadas tuttina a la lavur, incumbensas sco far la posta èn anc adina part dal mintgadi.