Refurma da l'AVS – dapli avantatgs che dischavantatgs

Da quest avis è la conferenza dals directurs per affars socials che han tractà la refurma da la prevenziun per la vegliadetgna ad ina seduta da suprastanza.

seniors che van a pe tras ina via d'ina citad Bild in Lightbox öffnen.

Legenda da maletgs: La refurma da l'AVS procura anc adina per discussiuns sin il palc politic. Keystone

Els sustegnian cleramain la refurma, ha ditg il vice-president da la conferenza e cusseglier guvernativ dal chantun da Son Gagl, Martin Klöti. Per els saja fitg impurtant che las rentas sajan segiradas e che la proxima generaziun haja in fundament solid sut lur pes. E precis quai possia la refurma porscher.

Plinavant saja ella in levgiament per ils chantuns areguard las prestaziuns supplementaras. La refurma segireschia numnadamain l'emprima e segunda pitga a lunga vista. Tar in na pudess tenor il liberaldemocrat Martin Klöti il dumber da pensiunads crescher marcantamain che n'èn betg abels da sa tegnair sur l'aua or d'atgna forza. Sche quai fiss il cas, lura stuessan ils chantuns pajar massivamain dapli prestaziuns supplementaras.

Per Martin Klöti è il decisiv ch'il parlament haja uss suenter discussiuns onns a la lunga finalmain chattà in cumpromiss. Quel consistia or da l'auzament da las rentas per novs pensiunads per 70 francs e la vegliadetgna da pensiun da 65 onns per tuts.

Pachet da la chombra davos

D'in auter maini è tranter auter er la partida mamma da Martin Klöti, la PLD. Per la presidenta, Petra Gössi, profitassan be paucs da la refurma, cunzunt da l'auzament per 70 francs. Ensemen cun la Partida populara svizra e las grondas organisaziuns da l'economia è la PLD dal maini ch'il sistem social vegnia schlargià cun l'auzament da las rentas. Quai stoppian lura las generaziuns giuvnas finanziar.

Plinavant è la PLD da l'avis che l'entira refurma saja in pachet da la chombra davos, fatgs d'ina coaliziun dals cristiandemocrats, ensemen cun ils socialdemocrats, ils burgaisdemocrats ed ils verds e verdliberals. La PLD n'haja tenor Petra Gössi gì nagina schanza da plazzar atgnas propostas. Quai vesa il president dals cristiandemocrats Gerhard Pfister dentant auter.

Il suveran svizzer votescha ils 24 da settember davart la refurma da l’ AVS.

RR novitads 15:00