L'Uniun svizra dals patruns è da l'avis ch'ins na possia uss betg simplamain ruassar tar la refurma da l'AVS. Er suenter ch'il suveran ha approvà la refurma dumengia passada, saja uss da lavurar enavant. La situaziun vegnia adina pli precara. Cura ch'ins ha introducì l'AVS finanziavan 6,5 persunas activas ina renta d'AVS. Fin il 2035 sajan quai anc 2,3 activs.
Chalar da far tema
L'Uniun sindicala svizra manegia en ina reacziun ch'ils patruns veglian uschia manar davent dal vair problem il livel da las rentas che sa sminueschia adina dapli. Gia oz hajan grondas parts da la populaziun betg avunda autas rentas en la vegliadetgna. Adina dapli persunas sajan avisads sin pajaments supplementars.
RR novitads 17:00