Refusà l'iniziativa da la Juso - L'iniziativa per in avegnir ha chattà fitg pauc sustegn

Ils Giuvens socialists survegnan ina sort «carta cotschna» per lur iniziativa per l'avegnir, che vuleva introducir ina taglia d'ierta naziunala per finanziar mesiras en favur dal clima. L'iniziativa è vegnida refusada cun 78,3% da las vuschs. Ina maioritad ha il project da la sanestra mo chattà en duas da las passa 2'000 vischnancas grischunas.

Ils dus Gea hai dà en la citad da Berna, ed en il pitschen vitg Schelten en il Giura Bernais. Insumma nagina vusch Gea ha l'iniziativa survegnì a Seehof ed a Berken en il chantun Berna, a Riemenstalden en il chantun Sviz, ed a Zwischbergen ed a Bister en il chantun Vallais.

Per Keller-Sutter nagina decisiun cunter il clima

Las votantas ed ils votants hajan mess terms ad in experiment riscant da la politica da taglia, ha ditg a Berna la ministra da finanzas Karin Keller-Sutter. Ed il resultat saja era d'interpretar sco in mussament d'attaschadadad a la plazza economica Svizra. I na sa tractia dentant betg d'in Na ad ina politica da clima activa.

La populaziun haja realisà tge consequenzas gravantas che l'iniziativa avess gì, hai num davart la federaziun tetgala Economiesuisse. Las venditas sfurzadas d'interpresas che fissan stadas da spetgar – hajan persvadì las votantas ed ils votants da tut ils champs politics. I saja uss cler ch'ina taglia d'ierta naziunala n'haja nagin sustegn da la populaziun.

Per las Giuvnas ed ils Giuvens socialists ha l'iniziativa procurà, independent dal resultat – che la debatta sur da taglias d'ierta saja puspè arrivada en il center da la politica. E la Juso vul vinavant cumbatter per la democrazia e per ina protecziun dal clima nua ch'ils burdis èn repartids gist – e cunter l'inegualitad creschenta.

Era il Grischun cun in massiv Na

L'iniziativa per l'avegnir dals Giuvens socialists è era vegnida refusada cleramain en il Grischun. Suenter che tut las 100 vischnancas han dumbrà las vuschs, han passa 82% da las votantas e dals votants ditg Na ad ina taglia federala sin l'ierta. Vehements Na hai dà in pau en l'entir Grischun – per exempel a Falera, Laax, Samignun, La Punt Chamues-ch e Farschno cun mintgamai enturn 90%. Almain in zic sustegn ha l'iniziativa dals Giuvens socialists chattà en pliras vischnancas da las valladas talianas, e lura era per exempel a Trin ubain Fideris.

Grischun di Na a l'iniziativa per l'avegnir

Tge ha l'iniziativa vulì

Enfin uss enconuschan mo chantuns e vischnancas la taglia d’ierta. Cun l'iniziativa avess era la Confederaziun pretendì ina taglia da 50%. Ils emprims 50 milliuns francs na fissan dentant betg stads suttamess a la taglia.

Las iniziantas ed ils iniziants vulevan dapli meds per il cumbat da la crisa da clima, e per la reconstrucziun da l’economia cumplessiva che fiss necessaria tenor els. Vitiers vuleva l’iniziativa era mesiras ch'impedeschan che persunas eviteschan la taglia, per exempel cun partir da la Svizra en in auter pajais.