Siglir tar il cuntegn

Header

cuntegn

Refusà recurs La bova da Bondo na saja betg stada previsibla

A quella conclusiun vegn la Dretgira chantunala. Ella suonda uschia a la decisiun da la procura publica e refusescha da trair vinavant il cas.

La Dretgira chantunala a Cuira aveva gì da s'occupar dal cas, perquai che l'advocat dals confamigliars da las unfrendas aveva fatg recurs cunter la finiziun da l'inquisiziun penala. La Procura publica aveva terminà l'inquisiziun cun l'argument che la bova na saja betg stada previsibla. Perquai na possian ins betg inculpar insatgi dad avair agì negligent.

A questa conclusiun è uss er vegnida la Dretgira chantunala a Cuira. Quai rapporta l'emissiun «Grigioni sera» da RSI il mardi sa referind sin la presidenta communala da Bregaglia e cussegliera naziunala, Anna Giacometti. Confermà quella decisiun da la Dretgira chantunala dals 10 da schaner, ha la Procura publica sco partida involvida. La sentenzia po anc vegnir tratga vinavant al Tribunal federal.

Otg persunas avevan pers la vita

Tar la bova da Bondo avevan ils 23 d'avust 2017 otg viandants da la Germania, Austria e Svizra pers lur vita. L'advocat dals confamigliars da las unfrendas aveva argumentà envers la Dretgira chantunala, che mesiraziuns duas emnas avant avevan mussà, ch'ils moviments dals grisps instabils al Piz Cengalo eran daventads pli ferms. I saja stà enconuschent, ch'i vegnia a dar ina bova da crappa pli gronda. I saja dentant vegnì manchentà da prender las mesiras da segirezza necessarias.

Per tadlar curt e cumpact:

audio
La bova da Bondo na saja betg stada previsibla
ord Novitads dals 28.01.2020.
laschar ir. Durada: 1 minuta 6 Secundas.

RTR novitads 18:00

Artitgels legids il pli savens