Siglir tar il cuntegn
Inhalt

Svizra Rega ha gidà en media mintga di a 29 persunas

La Rega ha gì l'onn passà in onn da record. Sco l'aviatica da salvament svizra communitgescha haja ella salvà en media 29 persunas per di. Quai è bun mintga mes'ura in servetsch.

Helicopter da la Rega.
Legenda: 44% dals sgols cun il helicopter eran en connex cun grevas u acutas malsognas sco per exempel culps u malsognas cardiovascularas. MAD

Il 2017 è la Rega stada bunamain 16'000 giadas en acziun. Quai èn tants servetschs sco anc mai. Betg mo ils helicopters da salvament cun 11'774 servetschs (plus 6,5%) mabain era ils jets d'ambulanza cun 886 servetschs (plus 3,3%) hajan gì da far dapli ch'ils onns passads, uschia la Rega. En tut hajan las forzas da salvament da la Rega tgirà 10'788 pazientas e pazients. Quai èn bun 7% dapli pazients che anc l'onn avant.

Cifras en il Grischun èn stadas constantas

La basa da la Rega a Samedan ha nudà l'onn passà 611 servetschs. Quai èn levamain pli paucs salvaments che anc il 2016. La segunda Rega en il Grischun, quella a Vaz Sut - è stada l'onn passà 719 en acziun. Quai èn pli u main tuttina blers servetschs sco l'onn avant.

Bell'aura munta blera lavur per la Rega

Cunzunt durant periodas suleglivas è la Rega sgulada savens. Ils mais ils pli intensivs sajan il favrer e l'october, dus mais da bell'aura che han carmalà en il liber la glieud. Cumpareglià cun l'onn avant han bun in quart dapli pazientas e pazients duvrà agid medicinal da la Rega. La Rega ha cun sia atgna centrala operativa sco era cun las dudesch basas da servetsch ha adina pudì porscher agid e quai era durant il temp cun bleras dumondas.

RR novitads 12:00