Siglir tar il cuntegn

Header

cuntegn

Rega Onn il pli intensiv da l'istorgia

Per l'emprima giada ha la Rega transportà passa 12'000 pazientas e pazients entaifer in onn. En media è la Guardia aviatica svizra da salvament sgulada 50 giadas a di. Quai è in plus da 10,3%.

La Rega è uschè dumandada sco anc mai. L'onn passà ha la Guardia aviatica svizra da salvament transportà passa 12'000 pazientas e pazients. Uschè blers sco anc mai en sia istorgia. Sco la Rega scriva, hajan ses helicopters e jets d'ambulanza transportà 34 pazientas e pazients a di (plus 10,3%).

Puspè dapli sgols en l'exteriur

L'onn passà ha la Rega sgulà enavos en Svizra 858 persunas (plus 32,6%). I sa tracta da persunas ch'han fatg accident en l'exteriur ubain vegnidas malsaunas. Ina raschun per quest augment è che Svizras e Svizras han puspè fatg dapli viadis en l'exteriur, cumpareglià cun l'emprim onn da la pandemia.

53’000 novs fauturs

Quai salvament professiunal ord l'aria durant 365 dis per onn na funcziunia betg senza il sustegn finanzial da fauturas e fauturs scriva la Rega vinavant. Passa 3,6 milliuns fauturs pussibiliteschan cun lur contribuziuns che la Rega po restar en l'aria. Quellas donaziuns fan ora passa la mesadad dal preventiv total da la Rega. Per la fin da l'onn 2021 han ins pudì registrà 53'000 novas fauturas e fauturs.

audio
Per tadlar: Las novitads da las 10:00
ord Novitads dals 01.02.2022.
laschar ir. Durada: 3 minutas 9 Secundas.

RTR novitads 10:00

Artitgels legids il pli savens