Cun quella decisiun sappian ins far insatge per il turissem en las regiuns muntagnardas, hai gì num en la chombra pitschna. 4 milliuns francs mintg'onn pon las pendicularas grischunas spargnar cun la decisiun dal parlament. Sin l'emprim egliada saja quai forsa in pitschen pass, di il Cusseglier dals chantuns cristiandemocrat, Stefan Engler.
Per las pendicularas saja quella restituziun parziala da la taxa sin il petroli per maschinas da pista dentant fitg impurtanta. Quai megliureschi la liquiditad da quellas. E sch’ins guardi en tge situaziun difficila che las pendicularas èn oz saja mintga pass envers ellas in bun pass.
Nagin'opposiziun - er betg da la sanestra
En il Cussegl dals chantuns n’hai dà nagin’opposiziun cunter la revisiun da la lescha, er betg da vart sanestra. Ils purs possian gia daditg profitar d'ina reducziun da la taxa sin petroli, di la Cussegliera dals chantuns socialdemocrata Anita Fetz. Era là saja quai atgnamain betg giustifitgà. «Jau na crai betg propi che quella decisiun vegni a purtar in grond levgiament per las pendicularas. Ils problems structurals restan. Mo nus essan stads generus.»
In gest simboblic?
Tut pia mo in gest simbolic dal parlament federal viers la branscha turistica en miserias? Na, di Stefan Engler. Mintg'ina da la 8 pendicularas grischunas grondas spargni cun la midada da la lescha da quai da 400'000 francs mintg'onn. Cun quels daners possian vegnir finanziadas investiziuns da 20 milliuns francs. Quai che correspundi per exempel a la colliaziun dals territoris da skis da Lai ed Arosa.
«Da pudair sustegnair investiziuns en l’infrastructura po esser in pli grond effect che mo la deliberaziun sezza.» Stefan Engler sa dentant era che quai na tanscha anc betg per vairamain megliurar la situaziun da las pendicularas ed dal turissem en las regiuns muntagnardas.
Las pendicularas dovran ulteriur sustegn da la politica.
Per bleras pendicularas è quella stagiun d’enviern ina catastrofa. E la primavaira vegnan ellas era a sentir quai en la cassa. Bain inquala vegn a vegnir en difficultads. I dovri perquai ulteriur sustegn da la politica. Per exempel tar la lavur curta, di Engler.
«Oz vegn pretendia che in’interpresa stoppia far ina sperdita da almain 75 pertschient per pudair profitar dal sustegn da la lavur curta. Quai è memia aut. L’industria classica sto ademplir auters criteris e vegn uschia pli simpel tar quels sustegns.»
In'auter sectur nua che la Confederaziun sappia gidar saja tar il rembursament da credits.
La Confederaziun stoppia era qua porscher maun per interrumper ils pajaments per ils credits. Era quai possia sustegnair las pendicularas, è Engler persvas.
La Confederaziun na po betg schliar tut ils problems dal turissem.
Confruntà cun quels giavischs reagescha il minister da finanzas, Cusseglier federal Ueli Maurer plitost a moda reservada. Ins stoppia far adatg da na betg avair l’impressiun che la Confederaziun possia schliar ils problems dal turissem. «En emprima lingia è il turissem sez dumandà. Ins sto renconuscher ch’i dat problems structurals el turissem. Mo sch’ins po gidar a megliurar la situaziun, lura possian ins segiramain trair en consideraziun quai.
Il Cussegl federal persequitescha la situaziun
Concret na saja dentant planisà nagut en quella direcziun. Il Cussegl federal saja tuttavia conscients ch'il turissem en las muntognas pateschian da las cundiziuns da naiv difficilas ed il ferm franc svizzer. Els persequiteschian ils svilups e sajan en discussiun cun la branscha.