Ils politichers burgais han defendì lur maioritad en la regenza bernaisa. Els èn vinavant represchentads tras quatter persunas. Beatrice Simon da la Partida burgais-democratica (PBD), Christoph Neuhaus da la Partida populara svizra (PPS) e ses collega da partida Pierre Alain Schnegg PPS restan en il gremi. E Philippe Müller da la Partida liberaldemocratica svizra (PLD) è vegnì elegì sco nov cusseglier da la regenza bernaisa. Müller, ch'ha gia rimnà experientscha sco politicher en il parlament surpiglia il post da Hans Jürg Käser.
Duas novas fatschas tar las partidas sanestras
Il champ verd-cotschen resta damai tar trais sezs. Quels occupan ina veglia e duas novas fatschas: Il socialdemocrat Christoph Ammann resta en l'uffizi e sia collega da partida Evi Allemann e Christine Häsler dals verds entran da nov en l'uffizi.
Las partidas da mez na pon conquistar nagins sezs. Totalmain han 16 persunas candidà per in plaz en il gremi.
Cussegl grond: PS e PLD cun dapli paisa
Ils victurs da las elecziuns en il Cussegl grond da Berna, èn ils socialdemocrats ed ils liberaldemocrats. La PS gudogna tschintg sezs, e la PLD vegn tar trais ulteriurs sezs. Quai ha annunzià la chanzlia chantunala bernaisa.
Laschar plimas ston en emprima lingia la partida populara. La PPS fa trais sezs damain, e la partida evangelica EVP perda dus sezs.
RR novitads 18:00