Adrian Löbsiger, l’incumbensà federal per la protecziun da datas ha confermà sin dumonda da l’agentura da novitads Keystone-SDA las retschertgas da SRF. El haja instradà la gievgia passada in scleriment dals fatgs.
La fundaziun Swisstransplant da sia vart sincerescha, ch'ella sa stentia adina da porscher la pli gronda segirtad pussaivla. Pervi da las rinfatschas hajan ins gia prendì tschertas mesiras. Il register saja stà serrà temporarmain – uss dentant saja el puspè accessibel. La fundaziun scriva ch’ins n’haja betg identifitgà largias en il sistem. E nagin n’haja pudì consultar datas da persunas u schizunt elavurar quellas.
In sistem manglus
Tenor las retschertgas da SRF mussa il rapport d’ina firma per la segirezza d’infurmaziuns, ch’il register da donaziuns d’organs haja gronds mancos da segirezza. Uschia saja pussaivel da registrar casualmain ina persuna sco donatura d’organs, senza che quella sappia insatge.
Il register naziunal da donaziuns d'organs da la fundaziun Swisstransplant cuntegna il mument las datas da radund 132’000 persunas.