Siglir tar il cuntegn

Svizra Registrà damain cas da vegnir illegal sur ils cunfins

Las guardias da cunfin han registrà fin la fin dal fanadur 10’400 entradas illegalas, quai èn 40% damain ch’ils emprims set mais dal 2017. Che pli paucs fugitivs arrivan en l’Europa, vala sco raschun principala.

Guardias da cunfin en acziun.
Legenda: Guardias da cunfin en acziun sin la staziun da Basilea. Keystone

Cumpareglià cun l'onn da record il 2016, è il dumber dals surpassaments illegals tranter il schaner ed il fanadur 2018 schizunt sa reducì per passa la mesadad. Quai mussan las novas cifras dal Corp da las guardias da cunfin. Traplà han las guardias da cunfin il pli savens persunas da la Nigeria, da la Gambia e da l’Eritrea.

Il pli savens en il Tessin

Bunamain la mesadad dals traplads, var 5’000 persunas, han las guardias da cunfin tramess davent e surdà a las autoritads da l’exteriur. Anc adina tschiffan las guardias la gronda part dals migrants en il Tessin. Fin il fanadur eran quai 3’000. I suondan las regiuns da la guardia da cunfins da Basilea e da Losanna, cun mintgamai radund 2’000 persunas.

RR novitads 17:00