Il chantun Son Gagl ha dà liber da sajettar in luf en la regiun da Sargans. Là avevan lufs stgarpà la stad 15 nursas sin duas alps en il territori da Flums. 10 da quellas tutgavan tar ina muntanera protegida cun tgauns. Cunquai sajan ils criteris per sajettar in luf ademplids, communitgescha la chanzlia dal chantun Son Gagl. La lubientscha da sajettar il luf vala per ils proxims 60 dis.
Probablamain hajan dus lufs chaschunà ils donns ch'eran gia vegnids cumprovads geneticamain ils onns precedents en il territori, scriva il chantun. I sa tractia d'in mastgel ed ina femella senza pitschens. Il monitoring dal luf n'haja mussà nagins mussaments da lufs giuvens.
