Siglir tar il cuntegn

Header

cuntegn

Regiun Zermatt-Cervinia La cursa rapida sur cunfins

  • La pista sur il glatscher è 5 kilometers lunga
  • La pista maina da la Svizra en l'Italia
  • La partenza sa chatta sin 3899 meters sur mar l'arrivada sin 2814 meters

Il sport da skis dovra nova ideas. Ina da quellas è la cursa rapida a Zermatt/Cervinia e quai en ina regiun enconuschenta sin l'entir mund. Sco culissa serva il Matterhorn. La muntogna che vegn fotografada il pli savens sin l'entir mund. La diva da las muntognas. Betg mo las superlativas che la cursa sco tala porscha, mabain er ch'ella vegn manada atras gia il november en ina regiun cun ina segirtad da naiv da quasi 100% fa questa idea interessanta.

audio
Idea per nova cursa rapida
ord Sportissimo dals 31.05.2020.
laschar ir. Durada: 5 minutas.

Betg concurrenza cun Lauberhorn

Markus Hasler, il CEO da las Pendicularas da Zermatt manegia che Zermatt na saja nagina concurrenza per il Lauberhorn – gist pervia dal temp che questa cursa vegn planisada, pia il november. Quai è in temps ch'i na dat fin ussa naginas cursas rapidas. Sulettamain ils tecnichers han cursas a Sölden en l'Austria ed a Levi en la Finlanda.

Zermatt e Cervinia avessan il november era anc spazi per pernottaziuns en lur destinaziun. Durant la stagiun auta da skis na pudessan els dentant betg surpurtar dapli giasts.

audio
Influenza economica da la cursa rapida
ord Sportissimo dals 31.05.2020.
laschar ir. Durada: 3 minutas 26 Secundas.

I dovra anc pazienza

Sco emprim vegna ussa las duas pendicularas en construcziun bajegiadas a fin. Gist pervia da quellas duas pendicularas èn ils responsabels insumma vegnids sin l'idea dad offrir a la FIS la pussaivladad da far questa cursa. Anc n'è la pista betg omologada, e perquai na san ins era betg exact quant lunga ch'ella vegn ad esser. La partenza a Gobba di Rollin e l’arrivada a Laghi Cime Bianchi – quai è en mintga cas ina via che maina da la Svizra en l'Italia. Quai fiss en sasez gia ina sensaziun. Sche tut va bain, pudess l'emprima cursa rapida vegnir manada atras gia l'enviern 2021/2022.

RTR Sportissimo

Artitgels legids il pli savens