Siglir tar il cuntegn
Inhalt

Svizra Reglà cundiziuns per «made in Switzerland»

Sch'in product po vegnir vendì sco product svizzer valan en l'avegnir cundiziuns pli severas. Il Cussegl federal ha reglà ils detagls per che la marca svizra po vegnir protegida meglier. Ils princips aveva il parlament francà en la lescha suenter lungas discussiuns.

pulpa sin in taglier da laina
Legenda: Era la pulpa sto avair almain 80 % materia prima svizra per valair sco product svizzer. Keystone

Tar las victualias èn decisivas las materias primas. Il product sto consister almain per 80 pertschient ord materia prima ord la Svizra. Products industrials valan sco products svizzers sche almain 60 pertschient dals custs da producziun resultan en Svizra.

Il giavel giascha en il detagl

Cura ch'il Cussegl federal ha tramess las ordinaziuns en consultaziun han reclamà intginas branschas. Nagina biera possia uschia anc vegnir numnà biera svizra hai per exempel gì num. Il Cussegl federal ha prendì encunter la critica e precisà las reglas. Uss ha el deliberà l'ordinaziun. El haja formulà la realisaziun uschè simpel sco pussaivel. Uschia hai per exempel num tar la biera: Tgi che fa biera en Svizra po vender questa sco biera svizra. Sch l'aua è impurtant per ina bavronda lura possia ella vegnir integrada en la calculaziun dals 80 %. Quai valia per biera ed aua minerala.

Reglas spezialas per tschigulata

Ina regla speziala datti era per café e tschigulata. Sche la tschigulata cuntegn materia che na po betg vegnir producida en la Svizra, lura po ella vegnir vendida sco tschigulata svizra, sche la materia vegn ellavurada dal tut en Svizra. Sche la tschigulata cuntegna latg, lura valian las cundiziuns usitadas.

RR novitads 22:00