Era en la Chasa federala daventan las mesiras da corona pli severas. Quai en vista da la proxima sessiun il mars. Ils parlamentaris na dastgan betg pli purtar giasts persunals en la Chasa federala. L’obligatori da purtar ina mascrina vegn schlargià. Uss èsi da metter si quella er en lieus ch'èn protegids cun paraids da plexiglas.
Vinavant duain parlamentarias e parlamentaris che tutgan tar la gruppa da ristg sa laschar vaccinar il pli svelt pussibel. Tenor atgna communicaziun ha la delegaziun decis quai suenter ch'ella ha discussiunà la dumonda cun l'Uffizi federal da sanadad BAG e cun la dunna media chantunala da Berna. Parlamentarias e parlamentaris èn numnadamain obligads da sa participar a la sessiun e quai da la lescha anora. Ellas ed els duain perquai vegnir protegids uschè bain sco pussibel.
