L’UE e la Gronda Britannia èn sa cunvegnidas la gievgia sin ina cunvegna da commerzi per il temp suenter il Brexit. Er Berna e Londra han ils ultims trais onns fatg plirs contracts per reglar las relaziuns tranter ils dus stadis suenter il Brexit: En tut duajan set cunvegnas reglar las relaziuns bilateralas. Quai en ils secturs da commerzi, traffic e transport, assicuranzas, migraziun, servetschs e cumbat cunter ils crims.
Tuttina datti anc largias: A partir dal prim da schaner croda la libra circulaziun da persunas davent. Ed i vegn a duvrar formulars supplementars tar il commerzi da rauba tranter la Svizra e la Gronda Britannia.
Cuntent è er Economiesuisse
Che la Gronda Britannia e l'Uniun europeica èn sa cunvegnids areguard lur relaziuns commerzialas, beneventa er l'associaziun economica Economiesuisse. Jan Atteslander, il responsabel per las relaziuns cun l'exteriur, ha ditg ch'i saja per la Svizra meglier ch'i dettia quella cunvegna enstagl da nagina.
Ord vista Svizra sajan las relaziuns en il sectur da finanzas cun la Gronda Britannia impurtantas. La finamira saja perquai da far er en quel sectur ina cunvegna cun la Gronda Britannia.
