Il Cussegl federal vul vinavant ir la via bilaterala cun l'uniun europeica. Quella via duai garantir relaziuns bunas e regladas, scriva la regenza. Auter che tar la cunvegna da basa na duai betg tut vegnir regulà en general, mabain singul en mintga sectur. Era sco la via en in cas da dispita duai esser duai vegnir reglà. Vitiers tutgia er ina cunvegna en la sparta energia sco er – da nov – segirezza alimentara ma er cunvegnas tar la perscrutaziun e la furmaziun. Ina cunvegna da basa 2.0 na saja nagin tema.
Sin questa basa duai dar discurs da sondagi cun l'Uniun europeica. Il Cussegl federal ha gì l'emna passada ina clausura nua che la direcziun per las relaziuns cun l'UE èn vegnidas discutadas. Planisadas èn sesidas regularas per far bilantscha da la situaziun en il dossier Svizra-UE.
Reducir differenzas cun UE
Karin Keller-Sutter, parsura dal Departament federal da giustia e polizia ha laschà evaluar ensemen cun ils auters departaments las differenzas en regulaziuns tranter l'UE e la Svizra. Il rapport vegnia valità a moda politica dal Cussegl federal. «Igl è uss d'identifitgar nua ch'igl è en l'interess da la Svizra da reducir talas differenzas cun l'UE». Quai saja stà ina dira lavur, ha ditg Keller-Sutter.
Er tge ch'ils partenaris socials din, veglian ins savair. La finala vegnia il Cussegl federal a pasar ils differents interess e decider en favur da la Svizra. Las cunvegnas bilateralas hajan ina gronda muntada en l'intern da la Svizra, gist en connex cun la libra circulaziun. Perquai duain ils partenaris socials esser da la partida gist davent da l'entschatta dal process.
I dettia 17 opziuns d'agir che stoppian vegnir resguardadas tar contractivas. Ina part giaja al Cussegl federal, ina part als chantuns ed ina part als partenaris socials per evaluar. Las pli grondas differenzas dettia tar la cunvegna davart la circulaziun libra da la populaziun, che pertutgian la politica dal martgà da lavur e la politica d'immigraziun. «Cun quai faschain nus noss pensum», ha ditg la ministra da giustia.
«Access simpel al martgà intern è impurtant»
La Svizra tgiria passa 100 contracts, mintga di penduleschian 380'000 persunas tranter ils cunfins da l'UE e la Svizra, declera Guy Parmelin. L'UE saja lunsch or il pli impurtant partenari economic da la Svizra e la Svizra saja integrada meglier en il martgà intern da l'Uniun europeica che inqual pajais commember. Sco exempel numna Parmelin l'industria da farma che profiteschia fermamain sch'i dettia pli paucas differenzas en las regulaziuns cun l'UE. El menziunescha er il program da perscrutaziun Horizon da l'UE. «La cumissiun da l'UE collia la cunvegna da basa cun l'access a perscrutaziun. Quai na chat jau betg endretg e quai flaivlenta la plazza da perscrutaziun. Quai vesan er auters pajais uschia.» I na saja betg chapibel che la Svizra na vegnia betg associada.
