A chaschun d'ina sesida publica, ha la cumissiun er crititgà la Procura publica federala. A quella na possian ins betg fidar. Perquai duain ils Stadis Unids reponderar lur collavuraziun cun la Procura publica federala. Il Cussegl federal aveva gia reagì avant la sesida: Il president da la Confederaziun Ignazio Cassis haja refusà las renfatschas en in discurs cun il minister da l'exteriur american Antony Blinken cun tutta vehemenza, ha communitgà la Chanzlia federala.
Malgrà che la cumissiun da Helsinki n'è strusch enconuschenta en ils Stadis Unids, na saja betg cler tge consequenzas che quest appel pudess avair per la Svizra, uschia la correspundenta da SRF en ils Stadis Unids, Isabelle Jacobi. Bain vegnia la Svizra adina puspè ludada perquai ch'ella haja surpiglià las sancziuns encunter la Russia, dentant valia la Svizra anc per bler Americans ed Americanas sco oasa da taglia. Ed il mument saja la chatscha sin la facultad ad oligarchs russ fitg populara a Washington, uschia Jacobi vinavant.
«Svizra è in dals pli gronds refugis dad offshore dal mund»
L'expert da dretg penal e corrupziun, Mark Pieth ha declerà durant l'inscunter che la Svizra saja in dals pli gronds refugis dad offshore ch'i dettia sin il mund. El ha avisà sin diversas foras en il sistem en la lescha da lavada da daners. Tranter auter manchia l'obligaziun da diligenza per advocatas ed advocats. Pieth ha proponì che las autoritads dals Stadis Unids duain agir directamain encunter advocatas ed advocats svizzers, sch'i dettia mussaments che quels cuntrafetschian sin cumond da lur clients russ a sancziuns dals Stadis Unids. Pieth è pia da l'avis ch'ils Stadis Unids duain far squitsch sin la Svizra.
