La proposta dal Cussegl federal prevesa ina renta transitorica fin a la pensiun ordinaria. Il Cussegl dals chantuns vul dentant mo pajar quella fin il pensiunament anticipà – fin ch’igl è pussaivel da retrair prematuramain la renta. El ha approvà ina proposta da Ruedi Noser (PLD Turitg) cun 23 cunter 21 vuschs, tar ina abstenziun.
Divers cussegliers burgais na vulevan betg entrar en la fatschenta. Il stadi social saja bajegià ora bain avunda, ha ditg Alex Kuprecht (PPS Sviz).
Proteger dischoccupads pli vegls
Il Cussegl federal vul meglierar cun la renta transitorica la segirtad sociala da las persunas pertutgadas. Ils custs per l’introducziun d’ina tala renta sajan minimals, ha argumentà il cusseglier federal Alain Berset. Ils effects per las persunas sajan dentant gronds. Enfin l'onn 2030 quinta il Cussegl federal cun custs da 230 miu. francs.
La votaziun finala è lura stada detg clera. Il Cussegl dals chantuns ha ditg gea cun 33 cunter 11 vuschs. Sco proxim sa fatschenta il Cussegl naziunal cun la fatschenta.
RTR novitads 17:00