L'onn passà han 35'000 persunas dapli ch'il 2019 retratg ina renta da vegliadetgna en Svizra. En tut han bunamain 2,5 milliuns persunas survegnì ina renta da vegliadetgna. Bun 200'000 han retschet ina renta da survivents. Quai mussa la statistica AVS per il 2020 che l'Uffizi federal per statistica ha publitgà. Las rentas èn vegnidas pajadas a persunas che vivan en Svizra ed en l'exteriur.
Ils assicurads han pajà l'onn passà contribuziuns da total 34,1 milliardas francs. Da quai èn vegnidas 9,3 milliardas da la Confederaziun e 2,9 milliardas da la taglia sin la plivalur che va a favur da l'AVS.
Dumber da pensiunads crescha ad in crescher
Cun l'augment dad 1,5% tar las rentas da vegliadetgna, cuntinuescha il svilup che gira gia dapi il 2001. Dapi lura è il dumber dals retschaviders creschì sin passa ina giada e mez tants sco avant. Las raschuns las pli impurtantas èn la demografia, che la glieud vegn pli veglia e ch'i dat uschia dapli persunas ch'èn en la vegliadetgna da renta. Sa dublegià è il dumber da rentas da vegliadetgna che van en l'exteriur.
Paucs esters cun rentas cumplainas
Tgi che ha pajà en l'AVS, survegn suenter la pensiun ina summa mensila che dependa dal temp ch'ins ha pajà l'AVS, da la paja e da bunificaziuns d'educaziun. Tar umens nunmaridads è la renta stada en media tar 1'866 francs, tar umens maridads tar 2'219 francs. Dunnas nunmaridadas han survegnì en media 1'894 francs e 1'520 francs las dunnas maridadas. Dunnas vaivas han survegnì en media 2'174 francs il mais.
Persunas da l'exteriur survegnan savens bler pli bassas rentas. Raschun è tenor il BFS il temp pli curt ch'els pajan l'AVS. Be radund 7% pajan la renta sur il temp cumplain e survegnan uschia er ina renta cumplaina. Tar ils Svizzers e las Svizras èn quai 84%.
Ord l'archiv:
