Sin la fin d'october bandunan Susanne Sugimoto (mainagestiun), Laurent Burst (president dal cussegl d'administraziun), Nadja Schnetzler (presidenta da la societad) ed er il schef da finanzas François Zosso il project ch'è vegnì lantschà il schaner 2018.
Ils motivs per las demissiuns sajan simpels, scriva la Republik en ses newsletter. Il pensum grond da metter sin pes il project saja fatg, uss dovria ina midada da generaziun.
Finanzas sco spetgà
Sco quai ch'ils responsabels scrivan ha Republik fatg l'emprim onn in deficit da 2,85 milliuns francs. Las pli grondas expensas, cun 3,5 milliuns francs, sajan las pajas da collavuraturas e collavuraturs. L'agen chapital è sin 1,8 milliuns francs e cun ils meds avant maun è il manaschi garantì fin il schaner, uschia hai num en l'emprim rapport annual. Uss ston vegnir renovadas las 14'000 commembranzas ord il crowdfunding e las 3'000 commembranzas da l'entschatta. Republik vul cuntanscher che duas da trais commembranzas pon vegnir mantegnidas.
Passa 400 artitgels
En l'emprim onn ha la «Republik» publitgà 435 artitgels cun in volumen da 4,5 milliuns segns. (Tranter auter er plirs artitgels dal cartel da construcziun da l'Engiadina e dal whistleblower Adam Quadroni). Ils pli blers commembers (bunamain la mesadad) derivan dal chantun Turitg, 18% dal Mittelland e 14% da la Svizra nordoccidentala.
RR novitads 15:00
