Siglir tar il cuntegn

Header

cuntegn

Reserva obligatorica Per branscha da café resta café ina bavronda existenziala

Il cussegl federal vul schliar las reservas da café. Quai na plascha dentant betg a la branscha da café svizra. Lezza è da l’avis che café saja ina bavronda existenziala ed il provediment na saja betg garantì.

Las reservas da rauba essenziala per la vita en temp da gronda mancanza, duain procurar che la populaziun ha avunda per surviver. Las reservas da café tanschan il mument per in mez onn. Sper medicaments, vegnan er graun, zutger, ris e café tegnids sin reserva.

Nagina valur energetica

L'avrigl ha il Cussegl federal mess en dumonda las reservas da café en sia revisiun davart las reservas obligatoricas da nutriment. Ils favs da café na sajan betg in nutriment essenzial ed il ristg ch'il provediment crudass ensemen saja pitschen. Plinavant na cuntegnia il café quasi nagina valur energetica. Café vegnia plantà sin trais differents continents e vegnia racoltà l'entir onn. Sch'i dettia racoltas nauschas en in lieu, possian quellas vegnir cumpensadas cun café d'in auter lieu.

Federaziun da la branscha è d'in auter avis

La Federaziun da la branscha, IG Kaffee Svizra, declera dentant sin sia pagina che la Svizra è 100% dependenta da l'exteriur per survegnir il café. Plinavant giajan las reservas da café en quests pajais dapi onns enavos. Catastrofas natiralas, setgira, donns da l'ambient u er la sabotascha tras hackers vegnia pli e pli extrema e cun quai na saja il provediment da café betg garantì.

RR novitads 10:00

Artitgels legids il pli savens