- Il Cussegl federal vul introducir novas reglas da responsabladad per interpresas grondas ed uschia s'orientar a l'Uniun europeica.
- Ses project, che duai esser ina cuntraproposta indirecta a l’iniziativa per concerns responsabels, è sumegliant a las novas prescripziuns da l'UE, dentant en ina furma mitigiada.
- La segunda iniziativa per concerns responsabels sco tala refusa il Cussegl federal.
- Sia cuntraproposta indirecta planisada, la lescha davart la gestiun persistenta d’interpresas, ha el dà en consultaziun fin ils 9 da fanadur.
La cuntraproposta duai garantir che interpresas grondas svizras sa tegnan vid las prescripziuns davart ils dretgs umans e protegian l’ambient, scriva il Cussegl federal. Il medem mument stoppian las interpresas restar cumpetitivas.
Interpresas grondas duain sa tegnair vid obligaziuns da diligenza specificas areguard ils dretgs umans e l’ambient. Pertutgadas fissan las 30 interpresas las pli grondas dal pajais.
Percunter fissan pli paucas interpresas che oz obligadas da rapportar davart la persistenza, numnadamain var 100 interpresas. Oz vala quai per circa 200 interpresas.