Responsabladad per l'ambient - Giuvens Verds han lantschà iniziativa per l'ambient

La natira duai dictar il tempo a l'economia e na betg il cuntrari. Quai pretendan ils Giuvens Verds en lur iniziativa dal pievel. La moda co che la Svizra lavuria actualmain donnegia l’ambient. Senza mesiras giaja il pajais vers pliras crisas da l’ambient, uschia han ils Giuvens Verds declerà avant las medias. La finamira da l’iniziativa da la responsabladad envers l’ambient è da reducir la polluziun da l’ambient ils proxims 10 onns. La Svizra duai be anc duvrar uschè bleras resursas ed emetter uschè bleras substanzas nuschaivlas sco la natira po cumportar.