Siglir tar il cuntegn
Inhalt

Svizra Restanzas da glifosat nagin ristg per cancer

In studi da la Confederaziun condluda che restanzas da glifosat en mangiativas na sajan nagin ristg per cancer. Las restanzas sajan uschè pitschnas ch'i n'haja naginas consequenzas per la sanadad da cumsumentas e consuments. Perquai n'ha il Cussegl federal decidì naginas mesiras.

Maletg d'ina inscripziun sin in canister da glifosat.
Legenda: Las restanzas da glifosat en mangiativas n'èn tenor in studi da la Confederaziun nagin ristg per la sanadad. Keystone

En 60% da las mangiativas analisadas n'hajan ins chattà naginas restanzas da glifosat. Las ulteriuras provas hajan gì en be restanzas minimalas dal erbicid. Cunquai na sajan quellas betg in ristg per la sanadad, scriva l'Uffizi federal da sgirezza alimentara e fatgs veterinars. Pir sch'ins mangiass mintga di passa 70 kg pasta u passa 650 kg paun fissi da quintar cun consequenzas.

Dapli glifosat en products da l'exteriur

Products svizzers han cuntegnì pli pauc restanzas da glifosat che products da l'exteriur. Quai per il motiv che l'erbicid è scumandà en Svizra curt avant la racolta. Per il studi èn passa 240 provas vegnidas examinadas. Quai cunzunt da products nua ch'ins spetga restanzas da glifosat, sco p. ex. products da graun u er da fava.

Glifosat vegn tranter auter duvrà per eliminar zerclim u per impedir quel da crescher.

RR novitads 12:00