Il detaglist Migros ha reducì marcantamain persunal l’onn passà. Tenor retschertgas da la «NZZ am Sonntag» haja Migros stritgà 1’500 plazzas da lavur en las 10 cooperativas regiunalas. Il detaglist ha confermà d’avair fatg programs da reorganisaziun.
Tenor la NZZ am Sonntag ha uschia la cooperaziun da la Svizra Orientala stritgà 5,6% da tut las plazzas, quai che correspunda a radund 530 plazzas da lavur. Migros Aare ha reducì il dumber da persunal per 3,7% u concret per 430 plazzas da lavur. Be Migros Turitg ha mantegnì il dumber dad impiegads.
En tut occupescha Migros actualmain passa 99'000 persunas. Il 2019 aveva Migros anc passa 106'000 impiegads. L’emna passada ha il directur da Migros, Fabrice Zumbrunnen, anc pretendì che la reducziun da persunal saja per gronda part d’attribuir a la vendita da societads affiliadas sco Globus u Depot.
Ord l'archiv da Radio SRF:
