Uscheprest che l'unda dad omicron haja surpassà il punct culminant, duain las mesiras vegnir schluccadas svelt. Quai è il tenor general da las regenzas chantunalas. Uschia scrivan per exempel ils chantuns Son Gagl, Appenzell Dadens e Dador e la Turgovia, ch'els vulan ina examinaziun regulara da la situaziun actuala. En la medema crenna dattan chantuns en tut la Svizra. Il chantun Tessin pretenda per exempel ina nova examinaziun la fin da favrer, il chantun Vallais schon il mez favrer.
Sustegn per ina prolungaziun da las mesiras existentas datti percunter dals chantuns Argovia, Soloturn e Turitg. Il chantun Turitg vul mo, che l'obligatori da far homeoffice vegnia schon schlià pli baud.
Consultaziun areguard certificats
Il Cussegl federal vul en pli reducir la valaivladad da tut ils certificats da vaccinaziun, da 365 sin 270 dis. Er il certificat per guarids duai vegnir reducì sin 270 dis. Per questa mesira datti grond sustegn tar ils chantuns. I saja essenzial, ch'ils certificats restian er vinavant valaivels en l’Uniun europeica.
In cler Na datti dals chantuns puncto scumond dad instrucziun da preschientscha en scolas autas. Quai saja ina intervenziun massiva en il dretg sin furmaziun, scriva per exempel il chantun Basilea-Champagna. La regenza da Turitg fa attent sin la auta quota da persunas vaccinadas en las universitads e scolas autas.
Dapli fatgs, infurmaziuns ed istorgias chattais qua.