En Svizra pudessan las pajas puspè crescher pli fitg ch'ils ultims onns. Quai en vista a l'inflaziun che crescha, però er pervia da la mancanza da persunal spezialisà. Las interpresas quintan il mument en media cun in augment da 1,6%, mussa ina retschertga dal post da conjunctura da l'ETH da Turitg. Las differenzas tranter ils manaschis, sajan però fitg grondas. Uschia quintan 40% dals dumandads cun in augment da 2%. In quart percunter spetga in augment da be 0,5% u damain. Fatg part da la retschertga han 1'550 interpresas.
Pajas pli autas en IT e gastronomia
Sur tut en las branschas da finanzas e da servetschs d'infurmaziun vegn spetgà ch'i dettia in augment da pajas da fin a 2%. Dentant er tar la gastronomia, che ha patì l'ultim temp d'ina mancanza da persunal qualifitgà, èsi da spetgar in grond augment.
In augment in zic pli pitschen pudessi dar en la branscha d'architectura ed il commerzi grond u er en la branscha da chemia. Radund 1% dapli paja han las interpresas prognostitgà en la branscha da sanadad u tar l'educaziun.
Adattaziun annuala
Radund 90% da las interpresas adatteschian lur pajas ina giada l'onn. La gronda maioritad adattescha las pajas il schaner (66%), in pitschna part adattescha las pajas il december 89%), il mars u l'avrigl (15%). Quest ritmus annual haja dentant per consequenza ch'il svilup da las pajas ha retard envers il svilup da la conjunctura. Uschia na sajan la gronda part da las pajas anc betg adattadas en vista a la guerra en Ucraina ed ils pretschs creschids pervi da quella. La guerra vegn ad influenzar pir la proxima runda da paja che vegn pir il schaner 2023.