Tar la populaziun svizra crescha il sustegn per la via bilaterala cun l'Uniun europeica. Tenor ina retschertga vesa ina maioritad da 59% surtut avantatgs tar ina cunvegna bilaterala. Cumpareglià cun la retschertga da l'onn passà è questa cumpart creschida per 6 puncts procentuals. Quai resulta da la retschertga che vegn fatga mintg'onn da l'institut da pescrutaziun gfs Bern.
23% da las dumandadas e dals dumandads vesan tant dischavantatgs sco er avantatgs tar la via bilaterala – 12% plitost u surtut dischavantatgs. Augmentà la popularitad da l'UE tar Svizras e Svizzers haja surtut l'invasiun russa, uschia ils auturs dal studi.
La pli gronda differenza co insatgi giuditgescha la via bilaterala, fa l'atgna posiziun politica. Uschia vesan radund 3/4 da quels e quellas che sustegnan la partida socialdemocratica, oravant tut avantatgs en ils contracts cun l'UE. Quai èn 19 puncts procentuals dapli ch'avant in onn. En la medema direcziun van ils resultats tar la AdC e la PLD. Betg grondas midadas hai dà tar quels che sustegnan ils Verds, Verd-liberals e la PPS. Sco era tar quels che na sustegnan nagina partida.
Era scolaziun e lingua han ina influenza
Oravant tut persunas cun in diplom dal stgalim terziar sustegnan las contractivas, radund 75%. Tar persunas cun in nivel mesaun sustegnan be pli 48% la via bilaterala. Il pli grond sustegn vegn or da la Svizra tudestga, là hai dà in augment da 10% sin 62%. En la Svizra franzosa e taliana ha il sustegn pers, 53% dals Romands sustegnan las contractivas, 40% da quels che tschantschan talian.