Siglir tar il cuntegn

Header

Navigaziun

Bandieras da l'UE e da la Svizra.
Legenda: La cunvegna da basa cun l'UE na chatta actualmain nagina maioritad tar ils Svizzers e las Svizras. Keystone
cuntegn

Retschertga Pauc sustegn per cunvegna da basa cun l'Uniun europeica

Tenor ina retschertga da la Tamedia, sustegnan sulettamain 20% dals dumandads la cunvegna da basa actuala. Ed er il cusseglier federal, Guy Parmelin, pretenda tractativas supplementaras tar il text da contract actual.

Il sustegn per la cunvegna da basa cun l'UE è il mument pitschen en la populaziun. Tenor ina retschertga da las gasettas da Tamedia vul sulet in tschintgavel dals dumandads, ch'il Cussegl federal suttascrivia la cunvegna spert e senza midadas.

Maioritad refusa cunvegna actuala

Da l'autra vart refusan radund dus terzs dals dumandads la cunvegna da basa cun l'UE sco ella è actualmain. 26% dals dumandads na vulan insumma nagina cunvegna cun l'UE e radund 41% pretendan tractativas supplementaras dal contract.

Retschertga da Tamedia

Personen-Box aufklappenPersonen-Box zuklappen

A la retschertga èn sa participadas 14'670 persunas da l'entira Svizra. Vegnida fatga è l'enquista tranter ils 17 ed ils 19 da matg.

Cussegl federal è conscient

En in'intervista cun il «SonntagsBlick» ha il cusseglier federal, Guy Parmelin, pretendì ch'i saja anc ina giada dad ir sur ils cudeschs, quai che pertutgia la cunvegna da basa cun l'UE. El saja conscient ch'il text da contract actual na chattia nagina maioritad en la populaziun. I saja perquai anc ina giada da contractar cun l'UE. Puncts dispitaivels èn per el: la directiva da burgais da l'uniun, las mesiras accumpagnantas ed ils subsidis da stadi.

Studi dal mars passà vegn ad autra conclusiun

In studi da fin mars da l'institut gfs.bern aveva anc mussà in maletg pulit cuntrari – cun 60 pertschient che sustegnessan pli u main la cunvegna.

RR novitads 09:00